ഷണ്മുഖദശകം

1 

ജ്ഞാനച്ചെന്തീയെഴുപ്പിത്തെളുതെളെ വിലസും-

ചില്ലിവല്ലിക്കൊടിക്കുള്‍-

മൗനപ്പൂന്തിങ്കളുള്ളൂടുരുകുമമൃതൊഴു-

ക്കുണ്ടിരുന്നുള്ളലിഞ്ഞും

ഞാനും നീയും ഞെരുക്കെക്കലരുവതിനരുള്‍-

ത്തന്മയാം നിന്നടിത്താര്‍-

ത്തേനുള്‍ത്തൂകുന്ന മുത്തുക്കുടമടിയനട-

ക്കീടു മച്ചില്‍ക്കൊഴുന്തേ!

2         

തൂമത്തിങ്കള്‍ക്കിടാവും തിരുമുടിയിടയില്‍

പാമ്പെലുമ്പുമ്പരാറും

ശ്രീമച്ചെമ്പന്‍ മുടിക്കല്‍ തിരുവൊളിചിതറി-

ച്ചിന്തുമന്തിച്ചുവപ്പും

നാമപ്പൊട്ടിട്ടിണങ്ങുംനെറുക ചെറുപിറ-

ക്കീറു കാര്‍വില്ലു വെല്ലു-

ന്നോമല്‍പ്പൂഞ്ചില്ലിവല്ലിക്കൊടിയുമടിയനുള്‍-

ക്കണ്‍മുനയ്ക്കെന്നു കാണാം?

3         

ഓമല്‍ച്ചുണ്ടും ചിതുമ്പിച്ചെറുചിരി ചിതറും

തിങ്കളില്‍ പങ്കജപ്പൂ

താവിത്തൂകും കടാക്ഷത്തിരുമധുമധുരം

മാരി കോരിച്ചൊരിഞ്ഞും

കാമം മുന്‍പായ് മുളയ്ക്കും കളമുളകളറു-

ത്തുള്‍നിലത്തന്‍പു വിത്തി-

ട്ടീമദ്ഭക്തിപ്പൊടിപ്പിന്‍ പയിര്‍കതിര്‍വരുമാ-

റാകണേ താരകാരേ!

4         

സ്വര്‍ണ്ണക്കണ്ണാടി കൂപ്പുംകവിളിണയൊളിവില്‍

കുണ്ഡലം കര്‍ണ്ണബിംബം

കണ്ണില്‍ക്കാണ്‍മാന്‍ കൊതിപ്പൈങ്കിളിയുടെ പവിഴ-

ച്ചുണ്ടു തോല്ക്കുന്ന മൂക്കും

വെണ്ണക്ഖണ്ഡത്തിനുള്ളാ വെളിയൊളികളയും

താടിയും തേടുമീയെ-

ന്നുണ്ണിപ്പൈന്തേന്‍കുഴമ്പേ! പിഴപൊറുകയിവന്‍

ചെയ്തതും ചെയ്വതും നീ.

5         

ആലക്കാലക്കഴുത്തേലരവവുമതിലൂ-

ടാടിയോടുന്ന പൊന്നിന്‍-

നൂലില്‍ കോര്‍ത്തിട്ടു ചാര്‍ത്തിക്കിലുകിലയൊലികൊ-

ള്ളുന്ന വെള്ളച്ചിലമ്പും

വേലും ശൂലം വിളങ്ങും വരദവുമഭയം

ചെങ്കരത്താരിലേന്തി-

പ്പാലാലോലുംമടുത്തൂംപുതുമൊഴിയൊഴുകും

വായുമായ് വാ കളിപ്പാന്‍.

6         

കൂറില്‍ കൂറുണ്ടു വെണ്ണീര്‍നറുമലര്‍കളഭ-

ക്കൂട്ടണിഞ്ഞുള്‍വിളങ്ങും-

മാറും മാറും മനത്തീയരിയ കൊടുമുടി-

ക്കാതലെന്‍ കല്ലുനെഞ്ചേ,

തേറും തേറും തിരിഞ്ഞീടകമലരൊളിവു-

ള്ളത്തിരുക്കോലമെന്നാല്‍

നീറും നീറും നിരപ്പേ നിരയനിരയുമ-

മ്പെയ്യുമയ്യമ്പവമ്പും.

7         

തീരത്തീരത്തിരുത്തൂവരുവയറരുമ-

പ്പൊക്കിള്‍ പിന്‍ പൊന്നരഞ്ഞാണ്‍

താരില്‍ കോര്‍ത്തിട്ടു തങ്കത്തരി തിരളുമര-

ക്കിങ്ങിണിത്തൊങ്ങല്‍ തൂക്കി

നീരില്‍ത്താരമ്പരന്നക്കൊടിയടിമുടി നീ-

രാളി നീര്‍വാറുമൂടി-

ന്നേരം നേരന്നടിച്ചെന്‍ മുരുകയരികില്‍ വാ

മുത്തുവാന്‍ മൈലിലേറി.

8         

ഊഴിത്തട്ടിന്നൊഴുക്കായിഴുകിന ജഘന-

ത്താഴികക്കെട്ടിനുള്‍പ്പൊന്‍-

വാഴത്തണ്ടും മണിത്തൂണഴകുമൊഴിയുമ-

ത്തൃത്തുടക്കാമ്പു രണ്ടും

താഴത്തൂറിത്തുളുമ്പും മടുമലര്‍ശരവീ-

രന്‍ മണിച്ചെപ്പു കൂപ്പും

താഴംപൂപ്പൊന്‍കണങ്കാല്‍ തിരുവടിയണിമു-

ട്ടും മറന്നീടുമോ ഞാന്‍?

9         

മിന്നിച്ചിന്നുന്ന രത്നക്കുമിളകള്‍ നരിയാ-

ണിക്കു തൃക്കാഴ്ച വച്ചോ-

രുണ്ണിച്ചെന്താമരപ്പൂവടിയിലടിമവേ-

ലത്തിറം പെറ്റുകൊള്‍വാന്‍

തന്നില്‍ത്തങ്കച്ചിലമ്പിന്‍ ഝലഝലനിനദം-

കൊണ്ടെഴുന്നള്ളി വന്നെന്‍-

മുന്നില്‍ പൊന്നിന്‍കൊടീ! നിന്‍പുതുമകളടിയന്‍

കാണ്‍മതെന്നോമലുണ്ണീ?

10      

പത്തിന്‍ പത്തിപ്പുതുപ്പൂവിതളൊടു പടത-

ല്ലും വിരല്‍ത്താരകങ്ങള്‍

പത്തും ചിത്തം തുളുമ്പിച്ചൊരിയുമരിയ നി-

ന്നന്‍പൊഴുക്കൂറിയോടി

സത്തും ചിത്തും കലര്‍ത്തിശ്ശരവണഭവ! നീ

ഞാനുമായിട്ടൊരുന്നാള്‍

മുത്തും മുത്തുണ്ടിരിപ്പാന്‍ കനകമയില്‍ കരേ-

റിക്കളിച്ചോടിവാ നീ!