ദർശനമാല

1. അധ്യാരോപദര്‍ശനം

1

ആസീദഗ്രേfസദേവേദം

ഭുവനം സ്വപ്നവത് പുനഃ

സസര്‍ജ സര്‍വം സങ്കല്പ-

മാത്രേണ പരമേശ്വരഃ.

2

വാസനാമയമേവാദാ-

വാസീദിദമഥ പ്രഭുഃ

അസൃജന്മായയാ സ്വസ്യ

മായാവീവാഖിലം ജഗത്.

3

പ്രാഗുത്പത്തേരിദം സ്വസ്മിന്‍

വിലീനമഥ വൈ സ്വതഃ

ബീജാദങ്കുരവത്സ്വസ്യ

ശക്തിരേവാസൃജത്സ്വയം.

4

ശക്തിസ്തു ദ്വിവിധാ ജ്ഞേയാ

തൈജസീ താമസീതി ച

സഹവാസോfനയോര്‍നാസ്തി

തേജസ്തിമിരയോരിവ.

5

മനോമാത്രമിദം ചിത്ര-

മിവാഗ്രേ സര്‍വമീദൃശം;

പ്രാപയാമാസ വൈചിത്ര്യം

ഭഗവാംശ്ചിത്രകാരവത്.

6

ആസീത് പ്രകൃതിരേവേദം

യഥാfദൗ യോഗവൈഭവഃ

വ്യതനോദഥ യോഗീവ

സിദ്ധിജാലം ജഗത്പതിഃ.

7

യദാfത്മവിദ്യാസങ്കോച-

സ്തദാfവിദ്യാ ഭയങ്കരം

നാമരൂപാത്മനാfത്യര്‍ത്ഥം

വിഭാതീഹ പിശാചവത്.

8

ഭയങ്കരമിദം ശൂന്യം

വേതാളനഗരം യഥാ

തഥൈവ വിശ്വമഖിലം

വ്യകരോദദ്ഭുതം വിഭുഃ.

9

അര്‍ക്കാദ്യഥാക്രമം വിശ്വം

തഥാ നൈവേദമാത്മനഃ

സുപ്തേരിവ പ്രാദുരാസീ-

ദ്യുഗപത്സ്വസ്യ വീക്ഷയാ.

10   

ധാനാദിവ വടോ യസ്മാത്

പ്രാദുരാസീദിദം ജഗത്

സ ബ്രഹ്മാ സ ശിവോ വിഷ്ണുഃ

സ പരഃ സര്‍വ ഏവ സഃ.

2. അപവാദദര്‍ശനം

1

ചൈതന്യാദാഗതം സ്ഥൂല-

സൂക്ഷ്മാത്മകമിദം ജഗത്

അസ്തി ചേത്സദ്ഘനം സര്‍വം

നാസ്തി ചേദസ്തി ചിദ്ഘനം.

2

അന്യന്ന കാരണാത് കാര്യ-

മസദേതദതോfഖിലം

അസതഃ കഥമുത്പത്തി-

രനുത്പന്നസ്യ കോ ലയഃ?

3

യസ്യോത്പത്തിര്‍ലയോ നാസ്തി

തത് പരം ബ്രഹ്മ നേതരത്

ഉത്പത്തിശ്ച ലയോfസ്തീതി

ഭ്രമത്യാത്മനി മായയാ.

4

കാരണാവ്യതിരിക്തത്വാത്

കാര്യസ്യ കഥമസ്തിതാ?

ഭവത്യതഃ കാരണസ്യ

കഥമസ്തി ച നാസ്തിതാ?

5

കാര്യത്വാദസതോfസ്യാസ്തി

കാരണം ന ഹ്യതോ ജഗത്

ബ്രഹ്മൈവ തര്‍ഹി സദസ-

ദിതി മുഹ്യതി മന്ദധീഃ.

6

ഏകസ്യൈവാസ്തി സത്താ ചേ-

ദന്യസ്യാസൗ ക്വ വിദ്യതേ?

സത്യസ്ത്യാത്മാശ്രയോ യദ്യ-

പ്യസതി സ്യാദസംഭവഃ.

7

വിഭജ്യാവയവം സര്‍വ-

മേകൈകം തത്ര ദൃശ്യതേ

ചിന്മാത്രമഖിലം നാന്യ-

ദിതി മായാവിദൂരഗം.

8

ചിദേവ നാന്യദാഭാതി

ചിതഃ പരമതോ ന ഹി

യച്ച നാഭാതി തദസ-

ദ്യദസത്തന്ന ഭാതി ച.

9

ആനന്ദ ഏവാസ്തി ഭാതി

നാന്യഃ കശ്ചിദതോfഖിലം

ആനന്ദഘനമന്യന്ന

വിനാffനന്ദേന വിദ്യതേ.

10   

സര്‍വം ഹി സച്ചിദാനന്ദം

നേഹ നാനാfസ്തി കിഞ്ചന

യഃ പശ്യതീഹ നാനേവ

മൃത്യോര്‍മൃത്യും സ ഗച്ഛതി.

3. അസത്യദര്‍ശനം 

1

മനോമയമിദം സര്‍വം

ന മനഃ ക്വാപി വിദ്യതേ

അതോ വ്യോമ്നീവ നീലാദി

ദൃശ്യതേ ജഗദാത്മനി.

2

മനസോfനന്യയാ സര്‍വം

കല്പ്യതേfവിദ്യയാ ജഗത്

വിദ്യയാfസൗ ലയം യാതി

തദാലേഖ്യമിവാഖിലം.

3

വിജൃംഭതേ യത്തമസോ

ഭീരോരിഹ പിശാചവത്

തദിദം ജാഗ്രതി സ്വപ്ന-

ലോകവദ് ദൃശ്യതേ ബുധൈഃ.

4

സങ്കല്പകല്പിതം ദൃശ്യം

സങ്കല്പോ യത്ര വിദ്യതേ

ദൃശ്യം തത്ര ച നാന്യത്ര

കുത്രചിദ്രജ്ജുസര്‍പ്പവത്.

5

സങ്കല്പമനസോ കശ്ചി-

ന്നഹി ഭേദോfസ്തി യന്മനഃ

തദവിദ്യാതമഃ  പ്രഖ്യ-

മിന്ദ്രജാലമിവാദ്ഭുതം.

6

മരീചികാവത് പ്രാജ്ഞസ്യ

ജഗദാത്മനി ഭാസതേ

ബാലസ്യ സത്യമിതി ച

പ്രതിബിംബമിവ ഭ്രമാത്.

7

ആത്മാ ന ക്ഷീരവദ്യാതി

രൂപാന്തരമതോfഖിലം;

വിവര്‍ത്തമിന്ദ്രജാലേന

വിദ്യതേ നിര്‍മ്മിതം യഥാ.

8

മായൈവ ജഗതാമാദി-

കാരണം നിര്‍മ്മിതം തയാ

സര്‍വം ഹി മായിനോ നാന്യ-

ദസത്യം സിദ്ധിജാലവത്.

9

വിഭാതി വിശ്വം വൃദ്ധസ്യ

വിയദ്വനമിവാത്മനി

അസത്യം പുത്രികാരൂപം

ബാലസ്യേവ വിപര്യയഃ.

10   

ഏകം സത്യം ന ദ്വിതീയം

ഹ്യസത്യം ഭാതി സത്യവത്

ശിലൈവ ശിവലിങ്ഗം ന

ദ്വിതീയം ശില്പിനാ കൃതം.

4. മായാദര്‍ശനം 

1

ന വിദ്യതേ യാ സാ മായാ

വിദ്യാfവിദ്യാ പരാfപരാ

തമഃ പ്രധാനം പ്രകൃതിര്‍-

ബഹുധാ സൈവ ഭാസതേ.

2

പ്രാഗുത്പത്തേര്‍യഥാfഭാവോ

മൃദേവ ബ്രഹ്മണഃ പൃഥക്

ന വിദ്യതേ ബ്രഹ്മ ഹി യാ

സാ മായാfമേയവൈഭവാ.

3

അനാത്മാ ന സദാത്മാ സ-

ദിതി വിദ്യോതതേ യയാ-

സാ വിദ്യേയം യഥാ രജ്ജു-

സര്‍പ്പതത്ത്വാവധാരണം.

4

ആത്മാ ന സദനാത്മാ സ-

ദിതി വിദ്യോതതേ യയാ

സൈവാവിദ്യാ യഥാ രജ്ജു-

സര്‍പ്പയോരയഥാര്‍ത്ഥദൃക്.

5

ഇന്ദ്രിയാണി മനോബുദ്ധീ

പഞ്ചപ്രാണാദയോ യയാ

വിസൃജ്യന്തേ സൈവ പരാ

സൂക്ഷ്മാങ്ഗാനി ചിദാത്മനഃ.

6

അങ്ഗാന്യേതാന്യവഷ്ടഭ്യ

സുഖീ ദുഃഖീവ മുഹ്യതി

ചിദാത്മാ മായയാ സ്വസ്യ

തത്ത്വതോfസ്തി ന കിഞ്ചന.

7

ഇന്ദ്രിയാണാം ഹി വിഷയഃ

പ്രപഞ്ചോfയം വിസൃജ്യതേ

യയാ സൈവാ പരാ ധ്യാത്മ-

സ്ഥൂലസങ്കല്പനാമയീ.

8

ശുക്തികായാം യഥാfജ്ഞാനം

രജതസ്യ യദാത്മനി

കല്പിതസ്യ നിദാനം ത-

ത്തമ ഇത്യവഗമ്യതേ.

9

ധീയതേfസ്മിന്‍ പ്രകര്‍ഷേണ

ബീജേ വൃക്ഷ ഇവാഖിലം

അതഃ പ്രാധാന്യതോ വാfസ്യ

പ്രധാനമിതി കഥ്യതേ.

10   

കരോതീതി പ്രകര്‍ഷേണ

പ്രകൃത്യൈവ ഗുണാന്‍ പൃഥക്

നിഗദ്യതേf സൗ പ്രകൃതി-

രിതീഹ ത്രിഗുണാത്മികാ.

5. ഭാനദര്‍ശനം

1

അന്തര്‍ബഹിര്‍വദാസീനം

സദാ ഭ്രമരചഞ്ചലം

ഭാനം ദ്വിധൈവ സാമാന്യം

വിശേഷ ഇതി ഭിദ്യതേ.

2

സ്ഥൂലം സൂക്ഷ്മം കാരണം ച

തുര്യം ചേതി ചതുര്‍വിധം

ഭാനാശ്രയം ഹി തന്നാമ

ഭാനസ്യാപ്യുപചര്യതേ.

3

ദൃശ്യതാമിഹ കായോfഹം

ഘടോfയമിതി ദൃശ്യതേ

സ്ഥൂലമാശ്രിത്യ യദ്ഭാനം

സ്ഥൂലം തദിതി മന്യതേ.

4

അത്ര കായോ ഘട ഇതി

ഭാനം യത്തദ്വിശിഷ്യതേ

തഥാfഹമയമിതി യത്

സാമാന്യമിതി ച സ്മൃതം.

5

ഇന്ദ്രിയാണി മനോബുദ്ധീ

വിഷയാഃ പഞ്ചവായവഃ

ഭാസ്യന്തേ യേന തത്സൂക്ഷ്മ-

മസ്യ സൂക്ഷ്മാശ്രയത്വതഃ

6

അജ്ഞോfഹമിതി യദ്ഭാനം

തത് കാരണമുദാഹൃതം

അത്രാഹമിതി സാമാന്യം

വിശേഷോfജ്ഞ ഇതി സ്ഫുരത്.

7

അഹം ബ്രഹ്മേതി യദ്ഭാനം

തത്തുര്യമിതി ശംസ്യതേ

സാമാന്യമഹമിത്യംശോ

ബ്രഹ്മേത്യത്ര വിശിഷ്യതേ.

8

യത്ര ഭാനം തത്ര ഭാസ്യം

ഭാനം യത്ര ന തത്ര ന

ഭാസ്യമിത്യന്വയേനാപി

വ്യതിരേകേണ ബോധ്യതേ.

9

യഥാ ദൃഗ്ദൃശമാത്മാനം

സ്വയമാത്മാ ന പശ്യതി

അതോ ന ഭാസ്യതേ ഹ്യാത്മാ

യം പശ്യതി സ ഭാസ്യതേ.

10   

യദ്ഭാസ്യതേ തദധ്യസ്ത-

മനധ്യസ്തം ന ഭാസ്യതേ

യദധ്യസ്തം തദസദ-

പ്യനധ്യസ്തം സദേവ തത്.

6. കര്‍മ്മദര്‍ശനം 

1

ആത്മൈവ മായയാ കര്‍മ്മ

കരോതി ബഹുരൂപധൃക്

അസങ്ഗഃ സ്വപ്രകാശോfപി

നിദ്രായാമിവ തൈജസഃ.

2

മന്യേ വദാമി ഗൃഹ്ണാമി

ശൃണോമീത്യാദി രൂപതഃ

ക്രിയതേ കര്‍മ്മ പരമാ-

ത്മനാ ചിത്തേന്ദ്രിയാത്മനാ.

3

ആത്മൈവ കര്‍മ്മണഃ പൂര്‍വ-

മന്യത് കിഞ്ചിന്ന വിദ്യതേ

തതഃ സ്വേനൈവ കര്‍മ്മാണി

ക്രിയന്തേ നിജമായയാ.

4

ശക്തിരസ്ത്യാത്മനഃ കാചി-

ദ്ദുര്‍ഘടാ ന പൃഥക് സ്വതഃ

തയൈവാരോപ്യതേ കര്‍മ്മ

നിഖിലം നിഷ്ക്രിയാത്മനി.

5

സര്‍വദാfസങ്ഗ ഏവാത്മാ-

fജ്ഞതയാ കര്‍മ്മ സങ്ഗിവത്

കരോതി ന കരോമീതി

ന ജ്ഞഃ കര്‍മ്മസു സജ്ജതേ.

6

ജ്വലതി ജ്വലനോ വായുര്‍-

വാതി വര്‍ഷതി വാരിദഃ

ധരാത്മാ സന്‍ ധരതി ഖ-

ല്വേകോ വഹതി വാഹിനീ.

7

ഊര്‍ദ്ധ്വം പ്രാണോ ഹ്യധോfപാനഃ

ഖല്വേകോ യാതി നിഷ്ക്രിയഃ

നാഡ്യന്തരാളേ ധമതി

ക്രന്ദതി സ്പന്ദതി സ്ഥിതഃ

8

അസ്തിജന്മര്‍ദ്ധിപരിണ-

ത്യപക്ഷയവിനാശനം

ഷഡ്ഭാവമിഹ യോ യാതി

സ നാന്യോfവിക്രിയാത്മനഃ.

9

സ്വയം ക്രിയന്തേ കര്‍മ്മാണി

കരണൈരിന്ദ്രിയൈരപി

അഹം ത്വസങ്ഗഃ കൂടസ്ഥ

ഇതി ജാനാതി കോവിദഃ.

10   

ദൃശ്യത്വാദ് ഭാസ്യമഹമ-

പ്യതോfഹം ശുക്തിരങ്ഗവത്

അധ്യസ്തമേക ഏവാദ്യ

ശ്വോfപി സര്‍വോപരി സ്ഥിതഃ.

7. ജ്ഞാനദര്‍ശനം 

1

ജ്ഞാനമേകം ഹി നിരുപാ-

ധികം സോപാധികം ച തത്

അഹങ്കാരാദിഹീനം യജ്-

ജ്ഞാനം തന്നിരുപാധികം.

2

അഹന്തയാfന്തര്‍ബഹിര-

സ്തി യദേവമിദന്തയാ

ഭാനവൃത്ത്യാfന്വിതം യത്തു

ജ്ഞാനം സോപാധികം മതം.

3

അനാത്മനാമഹങ്കാരാ-

ദീനാം യേനാനുഭൂയതേ

സാക്ഷീ തദാത്മജ്ഞാനം സ്യാ-

ദ്യേനൈവാമൃതമശ്യതേ.

4

അഹങ്കാരാദികാര്യം യ-

ദനാത്മകമസംഖ്യകം

യേനാവഗമ്യതേfനാത്മ-

ജ്ഞാനം തദവധാര്യതേ.

5

യഥാവദ്വസ്തുവിജ്ഞാനം

രജ്ജുതത്ത്വാവബോധവത്

യത്തദ്യഥാര്‍ത്ഥവിജ്ഞാന-

മയഥാര്‍ത്ഥമതോfന്യഥാ.

6

യത്സാന്നിദ്ധ്യാദേവ സര്‍വം

ഭാസതേ സ്വയമേവ തത്

പ്രത്യക്ഷജ്ഞാനമിതി ചാ-

പരോക്ഷമിതി ലക്ഷ്യതേ.

7

യയാനുfസാധകം സാധ്യം

മീയതേ ജ്ഞാനരൂപയാ

വൃത്ത്യാ സാfനുമിതിഃ സാഹ-

ചര്യസംസ്കാരജന്യയാ.

8

ഗത്വാ സമീപം മേയസ്യ

മീയതേ ശ്രുതലക്ഷണഃ

യയാ സംവിത് സോപമിതിര്‍-

മൃഗോfയമിതി രൂപയാ.

9

അഹം മമേതി ജ്ഞാനം യ-

ദിദം തദിതി യച്ച തത്

ജീവജ്ഞാനം തദപര-

മിന്ദ്രിയജ്ഞാനമിഷ്യതേ.

10   

ഓം തത് സദിതി നിര്‍ദ്ദിഷ്ടം

ബ്രഹ്മാത്മൈക്യമുപാഗതം

കല്പനാദിവിഹീനം യ-

ത്തത് പരജ്ഞാനമീര്യതേ.

8. ഭക്തിദര്‍ശനം

1

ഭക്തിരാത്മാനുസന്ധാന-

മാത്മാffനന്ദഘനോ യതഃ

ആത്മാനമനുസന്ധത്തേ

സദൈവാത്മവിദാത്മനാ.

2

അനുസന്ധീയതേ ബ്രഹ്മ

ബ്രഹ്മാനന്ദഘനം യതഃ

സദാ ബ്രഹ്മാനുസന്ധാനം

ഭക്തിരിത്യവഗമ്യതേ.

3

ആനന്ദമേവ ധ്യായന്തി

സര്‍വേ ദുഃഖം ന കശ്ചന

യദാനന്ദപരം ധ്യാനം

ഭക്തിരിത്യുപദിശ്യതേ.

4

ആത്മൈവ ബ്രഹ്മ ഭജതി

നാന്യമാത്മാനമാത്മവിത്

ഭജതീതി യദാത്മാനം

ഭക്തിരിത്യഭിധീയതേ.

5

ആനന്ദ ആത്മാ ബ്രഹ്മേതി

നാമൈതസ്യൈവ തന്യതേ

ഇതി നിശ്ചിതധീര്‍ യസ്യ

സ ഭക്ത ഇതി വിശ്രുതഃ.

6

ആനന്ദോfഹമഹം ബ്രഹ്മാ-

ത്മാfഹമസ്മീതി രൂപതഃ

ഭാവനാ സതതം യസ്യ

സ ഭക്ത ഇതി വിശ്രുതഃ.

7

ഭാര്യാ ഭജതി ഭര്‍ത്താരം

ഭര്‍ത്താ ഭാര്യാം ന കേവലം

സ്വാനന്ദമേവ ഭജതി

സര്‍വോfപി വിഷയസ്ഥിതം.

8

ഏവം പശ്യതി കുത്രാപി

വിദ്വാനാത്മസുഖം വിനാ

ന കിഞ്ചിദപരം തസ്യ

ഭക്തിരേവ ഗരീയസീ.

9

ലോകസ്യ പിതരി സ്വസ്യ

ഗുരൗ പിതരിമാതരി

സത്യസ്യ സ്ഥാപിതരി ച

തത്പഥേനൈവ യാതരി.

10   

നിയന്തരി നിഷിദ്ധസ്യ

സര്‍വേഷാം ഹിതകര്‍ത്തരി

യോfനുരാഗോ ഭക്തിരത്ര

സാ പരാ പരമാത്മനി.

9. യോഗദര്‍ശനം 

1

സതതം യോജയതി യ-

ദ്യുനക്തി ച ചിദാത്മനി

മനോനിരോധരൂപോƒയം

സ യോഗ ഇതി ശംസിതഃ.

2

ന ദ്രഷ്ടാ ദര്‍ശനം ദൃശ്യം

വിദ്യതേ യത്ര തത്ര ഹൃത്

യോജയേദ്വാസനാ യാവ-

ദ്യോഗോƒയമിതി യോഗവിത്.

3

നാമരൂപമിദം സര്‍വം

ബ്രഹ്മൈവേതി വിലീയതേ

യദ്ബ്രഹ്മണി മനോ നിത്യം

സ യോഗ ഇതി നിശ്ചിതഃ.

4

ചിത്തസ്യ തൈലധാരാവ-

ദ്വൃത്ത്യാƒവിച്ഛിന്നയാƒƒത്മനി

നിരന്തരം രമ്യതേ യത്

സ യോഗോ യോഗിഭിഃ സ്മൃതഃ

5

യതോ യതോ മനോ യാതി

സദാƒƒത്മനി തതസ്തതഃ

നിയമ്യ യോജയേദേത-

ദ്യോഗോƒയം യുജ്യതാമിഹ.

6

സര്‍വാനര്‍ത്ഥകരഃ പുംസാം

സങ്കല്പഃ കല്പിതൈഃ സഹ

ഉന്മൂല്യ വാസനാജാലൈര്‍-

യേനാത്മനി നിരുധ്യതേ.

7

ദൃശ്യസ്യ ന ദൃശോƒസ്തിത്വ-

മതോ ദൃശ്യം ദൃഗാത്മകം

ഇതി യുഞ്ജീത ദൃഗ്രൂപേ

യഃ സ യോഗവിദാം വരഃ.

8

യദാ പിബന്‍ മനോഭൃങ്ഗഃ

സ്വാനന്ദമധുമാധുരീം

ന സ്പന്ദതി വശീകൃത്യ

യോജിതോ യോഗവായുനാ.

9

ധ്യാനമന്തര്‍ഭ്രുവോര്‍ദൃഷ്ടിര്‍-

ജിഹ്വാഗ്രം ലംബികോര്‍ധ്വതഃ

യദാ സ്യാത് ഖേചരീമുദ്രാ

നിദ്രാലസ്യാദിനാശിനീ.

10   

ജ്ഞാനം കര്‍മ്മേതി ലോകേƒസ്മിന്‍

ദ്വിധാ യോഗഃ സമാസതഃ

അനയോര്‍യോഗവിസ്താരഃ

സര്‍വഃ പരിസമാപ്യതേ.

10. നിര്‍വാണദര്‍ശനം

1

നിര്‍വാണം ദ്വിവിധം ശുദ്ധ-

മശുദ്ധം ചേതി തത്ര യത്

ശുദ്ധം നിര്‍വാസനം തദ്വ-

ദശുദ്ധം വാസനാന്വിതം.

2

അതിശുദ്ധം ശുദ്ധമിതി

ശുദ്ധം ച ദ്വിവിധം തഥാ

അശുദ്ധശുദ്ധം ചാശുദ്ധ-

മശുദ്ധാശുദ്ധമുച്യതേ.

3

അതിശുദ്ധം ത്രിധാ പശ്ചാ-

ദ്വരേ ചൈകം വരീയസി

ഏകമേകം വരിഷ്ഠേƒഥ

ശുദ്ധം ബ്രഹ്മവിദി സ്ഥിതം.

4

അശുദ്ധശുദ്ധം വിരജ-

സ്തമോƒന്യത് സരജസ്തമഃ

മുമുക്ഷൗ പ്രഥമം വിദ്യാദ്

ദ്വിതീയം സിദ്ധികാമിഷു.

5

ദഗ്ധ്വാ ജ്ഞാനാഗ്നിനാ സര്‍വ-

മുദ്ദിശ്യ ജഗതാം ഹിതം

കരോതി വിധിവത് കര്‍മ്മ

ബ്രഹ്മവിദ് ബ്രഹ്മണി സ്ഥിതഃ.

6

സംന്യസ്യ സര്‍വകര്‍മ്മാണി

സതതം ബ്രഹ്മനിഷ്ഠയാ

യശ്ചരത്യവനൗ ദേഹ-

യാത്രായൈ ബ്രഹ്മവിദ്വരഃ.

7

അന്യേന വേദിതോ വേത്തി

ന വേത്തി സ്വയമേവ യഃ

സ വരീയാന്‍ സദാ ബ്രഹ്മ-

നിര്‍വാണമയമശ്നുതേ.

8

സ്വയം ന വേത്തി കിഞ്ചിന്ന

വേദിതോƒപി തഥൈവ യഃ

സ വരിഷ്ഠഃ സദാ വൃത്തി-

ശൂന്യോƒയം ബ്രഹ്മ കേവലം.

9

ഹേയോപാദേയതാ ന ഹ്യ-

സ്യാത്മാ വാ സ്വപ്രകാശകഃ

ഇതി മത്വാ നിവര്‍ത്തേത

വൃത്തിര്‍നാവര്‍ത്തതേ പുനഃ.

10   

ഏകമേവാദ്വിതീയം ബ്ര-

ഹ്മാസ്തി നാന്യന്ന സംശയഃ

ഇതി വിദ്വാന്‍ നിവര്‍ത്തേത

ദ്വൈതാന്നാവര്‍ത്തതേ പുനഃ.

ഓം തത് സത്.