ഭദ്രകാള്യഷ്ടകം

ശ്രീമച്ഛങ്കരപാണിപല്ലവകിര-

ല്ലോലംബമാലോല്ലസ-

ന്മാലാലോലകലാപകാളകബരീ-

ഭാരാവലീഭാസുരീം

കാരുണ്യാമൃതവാരിരാശിലഹരീ-

പീയൂഷവർഷാവലീം

ബാലാംബാം ലളിതാളകാമനുദിനം

ശ്രീഭദ്രകാളീം ഭജേ.       1

ഹേലാദാരിതദാരികാസുരശിരഃ-

ശ്രീവീരപാണോന്മദ-

ശ്രേണീശോണിതശോണിമാധരപുടീം

വീടീരസാസ്വാദിനീം

പാടീരാദി സുഗന്ധിചൂചുകതടീം

ശാടീകുടീരസ്തനീം

ഘോടീവൃന്ദസമാനധാടിയുയുധീം

ശ്രീഭദ്രകാളീം ഭജേ.       2

ബാലാർക്കായുതകോടിഭാസുരകിരീ-

ടാമുക്തമുഗ്ധാളക-

ശ്രേണീനിന്ദിതവാസികാമരസരോ-

ജാകാഞ്ചലോരുശ്രിയം

വീണാവാദനകൗശലാശയശയ-

ശ്ര്യാനന്ദസന്ദായിനീ-

മംബാമംബുജലോചനാമനുദിനം

ശ്രീഭദ്രകാളീം ഭജേ.       3

മാതംഗശ്രുതിഭൂഷിണീം മധുധരീ-

വാണീസുധാമോഷിണീം

ഭ്രൂവിക്ഷേപകടാക്ഷവീക്ഷണവിസർ-

ഗ്ഗക്ഷേമസംഹാരിണീം

മാതംഗീം മഹിഷാസുരപ്രമഥിനീം

മാധുര്യധുര്യാകര-

ശ്രീകാരോത്തരപാണിപങ്കജപുടീം

ശ്രീഭദ്രകാളീം ഭജേ.       4

മാതംഗാനനബാഹുലേയജനനീം

മാതംഗസംഗാമിനീം

ചേതോഹാരി തനുച്ഛവീം ശഫരികാ-

ചക്ഷുഷ്മതീമംബികാം

ജൃംഭത്പ്രൗഢനിസുംഭസുംഭമഥിനീ-

മംഭോജഭൂപൂജിതാം

സമ്പത്സന്തതിദായിനീം ഹൃദി സദാ

ശ്രീഭദ്രകാളീം ഭജേ.       5

ആനന്ദൈകതരങ്ഗിണീമമലഹൃ-

ന്നാളീകഹംസീമണീം

പീനോത്തുംഗഘനസ്തനാം ഘനലസത്-

പാടീരപങ്കോജ്ജ്വലാം

ക്ഷൗമാവീതനിതംബബിംബരശനാ-

സ്യൂതക്വണത് കിങ്കിണീ-

മേണാങ്കാംബുജഭാസുരാസ്യനയനാം

ശ്രീഭദ്രകാളീം ഭജേ.       6

കാളാംഭോദകളായകോമളതനു-

ച്ഛായാശിതീഭൂതിമത്-

സംഖ്യാനാന്തരിതസ്തനാന്തരലസ-

ന്മാലാകിലന്മൗക്തികാം

നാഭീകൂപസരോജ(കാന്തിവി)ലസ-

ച്ഛാതോദരീം ശാശ്വതീം

ദൂരീകുർവയി ദേവി ഘോരദുരിതം

ശ്രീഭദ്രകാളീം ഭജേ.       7

ആത്മീയസ്തനകുംഭകുങ്കുമരജഃ-

പങ്കാരുണാലംകൃത-

ശ്രീകണ്ഠൗരസഭൂരിഭൂതിമമരീ-

കോടീരഹീരായിതാം

വീണാപാണിസനന്ദനന്ദിതപദാ-

മേണീവിശാലേക്ഷണാം

വേണീഹ്രീണിതകാളമേഘപടലീം

ശ്രീഭദ്രകാളീം ഭജേ.       8

ഫലശ്രുതിഃ

ദേവീപാദപയോജപൂജനമിതി

ശ്രീഭദ്രകാള്യഷ്ടകം

രോഗൗഘാഘഘനാനിലായിതമിദം

പ്രാതഃ പ്രഗേ യഃ പഠൻ

ശ്രേയഃശ്രീശിവകീർത്തിസമ്പദമലം

സംമ്പ്രാപ്യ സമ്പന്മയീം

ശ്രീദൈവീമനപായിനീം ഗതിമയൻ

സോƒയം സുഖീ വർത്തതേ.