ബ്രഹ്മവിദ്യ പഞ്ചകം

1

നിത്യാനിത്യവിവേകതോ ഹി നിതരാം

നിര്‍വേദമാപദ്യ സദ്-

വിദ്വാനത്ര ശമാദിഷട്കലസിതഃ

സ്യാന്മുക്തികാമോ ഭുവി,

പശ്ചാദ് ബ്രഹ്മവിദുത്തമം പ്രണതിസേ-

വാദ്യൈഃ പ്രസന്നം ഗുരും

പൃച്ഛേത് കോƒഹമിദം കുതോ ജഗദിതി

സ്വാമിന്‍! വദ ത്വം പ്രഭോ!

2

ത്വം ഹി ബ്രഹ്മ ന ചേന്ദ്രിയാണി ന മനോ

ബുദ്ധിര്‍ ന ചിത്തം വപുഃ

പ്രാണാഹങ്കൃതയോƒന്യദപ്യസദവി-

ദ്യാകല്പിതം സ്വാത്മനി

സര്‍വം ദൃശ്യതയാ ജഡം ജഗദിദം

ത്വത്തഃ പരം നാന്യതോ

ജാതം ന സ്വത ഏവ ഭാതി മൃഗതൃ-

ഷ്ണാഭം ദരീദൃശ്യതാം.

3

വ്യാപ്തം യേന ചരാചരം ഘടശരാ-

വാദീവ മൃത്സത്തയാ

യസ്യാന്തഃസ്ഫുരിതം യദാത്മകമിദം

ജാതം യതോ വര്‍ത്തതേ;

യസ്മിന്‍ യത്പ്രളയേƒപി സദ്ഘനമജം

സര്‍വം യദന്വേതി തത്

സത്യം വിദ്ധ്യമൃതായ നിര്‍മ്മലധിയോ

യസ്മൈ നമസ്കുര്‍വതേ.

4

സൃഷ്ട്വേദം പ്രകൃതേരനുപ്രവിശതീ

യേയം യയാ ധാര്യതേ

പ്രാണീതി പ്രവിവിക്തഭുഗ് ബഹിരഹം

പ്രാജ്ഞസ്സുഷുപ്തൗ യതഃ

യസ്യാമാത്മകലാ സ്ഫുരത്യഹമിതി

പ്രത്യന്തരങ്ഗം ജനൈര്‍-

യസ്യൈ സ്വസ്തി സമര്‍ത്ഥ്യതേ പ്രതിപദാ

പൂര്‍ണ്ണാ ശൃണു ത്വം ഹി സാ.

5

പ്രജ്ഞാനം ത്വഹമസ്മി തത്ത്വമസി തദ്

ബ്രഹ്മായമാത്മേതി സം-

ഗായന്‍ വിപ്രചര പ്രശാന്തമനസാ

ത്വം ബ്രഹ്മബോധോദയാത്

പ്രാരബ്ധം ക്വനു സഞ്ചിതം തവ കിമാ

ഗാമി ക്വ കര്‍മ്മാപ്യസത്

ത്വയ്യധ്യസ്തമതോƒഖിലം ത്വമസി സ-

ച്ചിന്മാത്രമേകം വിഭുഃ.